المساعد الشخصي الرقمي

مشاهدة النسخة كاملة : مجد الزعامه



عبدالله صالح العمري
01-12-2011, 01:35 AM
بمناسبة اليوم الوطني المجيد لدولة الإمارات العربية المتحدة
مجد الزعامه

يا لا بسه تاج الفخر والفخامه
******* ثوبك سلام ومهجتك ملتقى احباب
الله عليك يديم ثوب السلامه
****** ويديم من يرخص على شانك ارقاب
في ظل ابو سلطان مجد الزعامه
******* اللي نسج لك .. من سنا الشمس .. جلباب
خليفه اللي ما يخالف كلامه
******* فعله .. ولا في فعله الناس ترتاب
عاهدك واخلص بالعهود وغرامه
******* ياكن زايد حي للحين ما غاب
ما شي على نهجه يحدّث نظامه
******* تحديث ذلل للوطن كل الاصعاب
والشعب مخلص ما يخون إلتزامه
******* لا والذي نزّل على عبده كتاب
بصّم لك بقلبه .. وبصمة بهامه
******* شاهد على ما في الضماير والالباب
ويقول يا دار الوفا والكرامه
******* عليك حفظ الله .. من عيون الاعجاب
كل يوم ترقي في سما العز هامه
******* برجال تبني لك على أعناقها أعتاب
حتى متلكتي للتقدم زمامه
******* واصبح مقامك للحضارات محراب
مثل القمر تبدين ليلة تمامه
******* حلوه وتعشق منظرك عين واهداب
بْساطك الأخضر نخيل وخزامه
******* سقياه من ودّ المحبين ينساب
واليوم صرتي للحياه ابتسامه
******* يلقى بها المطعون لجروحه اطباب
من فيض حبك تستثير الغمامه
******* تمطر على الدنيا من اطيابك اطياب
والشعب يمشي فوق ارضك شهامه
******* نخوة عرب .. للموت ما يحسب احساب
ذخر الخوي واللي عنا الوقت ضامه
******* في الحق .. ما يخشى ملامات وعتاب
حتى فرض في كل قلب احترامه
******* وبعين كل انسان .. عَلاّ له اطناب
ان سار يمّ الغرب .. عالي مقامه
******* وان سار نحو الشرق .. تفخر به انساب
وين اتجه شعب الإمارات هامه
******* مرفوع راسه للطويلات كسّاب
يحصد من عيون الأماني وسامه
******* ويضيف في موسوعة العالم القاب
من بعد ما التاريخ ضاقت مسامه
******* لك يا إماراتي فتح سبعة ابواب
من فضل ربي ثم فضل الزعامه
******* حكام تبذل للعلا كل الاسباب
جميعهم واحد .. وواحد مرامه
******* شعب وقياده للوطن درع وحجاب
ودام الولاء فينا من الدين دامه
******* والله مانخشى سوا الله ونهاب
مهما مشى العالم بغير استقامه
******** ما يهمّنا الظالم ولا شرعة الغاب
حنّا شعب بالله دوم إعتصامه
******* واثق ومن وثّق مع الله ما خاب

شعر عبدالله صالح العمري

سالم الكعبي
01-12-2011, 03:02 AM
صح لسانك الشاعر
كلام طيب
وبيض الله ويهك

أخوك (حطّام)

محمد الشامسي
01-12-2011, 06:28 PM
صح لسانك اخوي عبدالله على هذي الابيات الجميله

كل عام وشيوخنا بصحه و سلامه
وكل عام والامارات و شعبها بخير

تقبل تحياتي اخوي عبدالله

تذكار
02-12-2011, 07:20 PM
صح لسانك يالشاعر
وكل عام والامارات بخير

عبدالله صالح العمري
07-12-2011, 09:18 PM
صح لسانك الشاعر
كلام طيب
وبيض الله ويهك

أخوك (حطّام)

الله يصح بدنك اخوي سالم شرفتني بمرورك الكريم
تقبل جزيل شكري

عبدالله صالح العمري
07-12-2011, 09:20 PM
صح لسانك اخوي عبدالله على هذي الابيات الجميله

كل عام وشيوخنا بصحه و سلامه
وكل عام والامارات و شعبها بخير

تقبل تحياتي اخوي عبدالله

هلا وغلا الله يصح بدنك اخوي عبدالله شرفتني بمرورك الكريم
تقبل جزيل شكري

عبدالله صالح العمري
07-12-2011, 09:21 PM
صح لسانك يالشاعر
وكل عام والامارات بخير

حياك الله اختي تذكار شرفتني بمرورك الكريم وصح الله قلبك
تقبلي جزيل شكري وتقديري

المتهور
07-12-2011, 10:37 PM
صح لسانك اخوي عبدالله على هذي الابيات

همس
11-12-2011, 09:05 AM
صح لسانك وعلا شانك ع هالقصيدة الرائعة ..

ابدعت فيها .. سلمت اناملك ..

لا تحرمنا من جديدك الرائع ..