المساعد الشخصي الرقمي

مشاهدة النسخة كاملة : لي ما درى عني



عبدالله صالح العمري
11-12-2011, 12:13 PM
لي ما درا عني ولا عن ظروفي
******** يلومني لى من سمع مني الآه

أغتر بالمظهر ولا شاف جوفي
******** كيف الألم يعصر من اقصاه لقصاه

وش ينتظر تنبت سياج بكفوفي
******** أو تنبت بوجهي سياط المعاناه

ياما بدم القلب صيغت حروفي
******** شعرٍ يبكي من تفطّن لمعناه

بين القهر والظلم طوّل وقوفي
******** كنّي أسير ولا لقى حد يفداه

واضحك كأن اللّي أراهم ضيوفي
******** من ما بوجه الضيف يضحك محياه

وقول ما دام الوفا من وصوفي
******** طبع الوفي يصبر على كل ماجاه

مهما أضّحي ما نتظر حد يوفي
******** راضي وما قدّر لي الله حياه

وإن كان همّي ما تشيله كتوفي
******** ما تنفع إمن العالمين المواساه

من ينتظر من غير ربه يروفي
******** للموت ما يلحق ربع ما تمناه

وان ساعدك بالحكي شخصِ عطوفي
******** من الوفا تصبح رهينه ليمناه

واللّي يعيش .. يشوف .. لوما يشوفي
******** مثلي لقيت من العجب سبعة أشباه

وليقت ناسٍ مثل شمس الكسوفي
******** ظلالها ظلمى .. وللخوف مدعاه

ولقيت ربعٍ ما عليهم حسوفي
******** فراقهم للقلب خيره و منجاه

والاجودي يبقى على الدوم موفي
******** ثابت على نهج الشهامه ومبداه

ماهو مثل من غيّرته الألوفي
******** تلقاه بين الناس بلباس حرباه

ويا لايمي قلبي حنون ورئووفي
******** لو شاف موقف باخر العالم أبكاه

لكني اتصبرعلى جروح جوفي
******** ولسان حالي دوم لله شكواه

واقول دينا آيله لـ النكوفي
******** ما خلّدت فيها هل المال والجاه

وإن شفت غالي عن وصالي عزوفي
******** أستسمحه واطلب من الله يا قاه

وجعل من البسمه وصبري سيوفي
******** أسلها بوجه الزّمن واتحداه

إمّا النصر وإلاّ ألآقي حتوفي
******** مرفوع راسي ما انحنى غير لله

شعر : عبدالله صالح العمري

سالم الكعبي
11-12-2011, 03:57 PM
صح لسانك أخوي عبدالله كلام جميل ووننتظر المزيد من الابداع

همس
11-12-2011, 07:56 PM
صح لسانك يالشاعر ع هالقصيدة الرائعة ..

لا تحرمنا من جديدك ..

تذكار
11-12-2011, 08:11 PM
صح لسانك اخوي عبدالله على القصيده الرائعه .. يعطيك الف عافيه ..

عبدالله الشامسي
11-12-2011, 09:19 PM
.
.

صح لسانك يالشاعر .. وربي يعطيك الف عافيه

.
.

دمت كما تحب

الحر الأشقر
14-12-2011, 08:11 PM
صح لسانك مليون على هذه القصيدة الجميلة


ودمت بود

المتهور
14-12-2011, 11:31 PM
لي ما درا عني ولا عن ظروفي
******** يلومني لى من سمع مني الآه



صح لسانك يالشاعر ع هالقصيدة

ونتظر الجديد ..

عــيـ دبـي ــون
16-12-2011, 10:07 PM
بين القهر والظلم طوّل وقوفي
******** كنّي أسير ولا لقى حد يفداه

واضحك كأن اللّي أراهم ضيوفي
******** من ما بوجه الضيف يضحك محياه


صح لسانك يالشاعر على هالقصيده الرائعه

ابدعت :)

محمد الشامسي
21-12-2011, 05:22 PM
صح لسانك اخوي عبدالله ابيات في غاية الروعه


تحياتي لك