المشاركة الأصلية كتبت بواسطة سعيد العامري
مرحباااااابج اختي
بداياتك في التصوير؟ ومتى البداية الفعلية لـ سعيد؟
البداية كانت اثناء دراستي في خارج الدولة .. في 2005 يوم صورت ربعي صورة تذكاربة عالغروب وكان من بينهم مصور وشاف النتيجة ولاحظ أن توزيعي كان مرتب في الصورة يعني كنت عاطي مسافة للغيوم الحمرا ومخلي الشباب على طرف الإطار ومسافة للشارع .. عيبته اللقطة وحب يشوف اذا عندي لقطات ثانية ماخذنها من قبل واذا بعدها مخزنة في الكاميرا ... عيبه تصويري ولاحظ أني أخذ زوايا جيدة .. فقال ليش ما تتعمق في هالمجال ؟ ما كنت افهم شي فالتصوير
وما كنت اعرف ان التصوير حتى يدرسونه .. فقال لي التصوير ذوق وفن وصبر .. بعد التخريج في نفس السنة يلست سنة كاملة ما امارس اي هواية .. قررت أني أخذ كاميرا من السوني وكانت Sony R1
قلت بجرب اصور وانخدعت فيها انها كاميرا احترافية
وشهر 10 شريت كاميرا من النيكون وكانت Nikon d80 ..وايد واجهت مشاكل في البداية وراسلت مصورين في منتديات لكن للأسف محد كان يرد على أسئلتي . فبديت اقرا الكتيب للكاميرا واجرب فص فص واصور .. لين ما تعرفت على اساسياتها وتمكنت منها الحمدلله
والبداية الفعلية كانت في 2007 مع تصوير القطرات وبعدها ضفت افكار مثل انعكاسات داخل القطرة وبعدها اتقلت للمعماري الليلي في تصوير دبي وتصوير الطبيعة .
نشاهد جمال وروعة الأفكار والتنفيذ في لقطاتك – ماشاء الله – فكيف تأتي الفكرة وهل يتم رسمها أو مثل مايقولون تأتي على البركة؟
هو يعتمد اختي على حسب الموضوع اللي اصوره .. بعض الصور تحتاج سيناريو وترتيب وأرسمها بالفعل قبل التنفيذ .. مثل تصوير البورتريه ..
واحيانا تخطيط ونفس الوقت استغلال الجو ( الحظ )
او مثلا طالعين رحلة لتصوير الطبيعة والعدسات كلها معاي ونوقف مكان عسب نصور وفجأة آتيك افكار وتنفذها نفس الوقت ( تجرب حظك لأنك ما تعرف كيف بتطلع النتيجة واستمر فالمحاولة لين ما توصل لنتيجة ترضيك )
بالنسبة لتصوير الطبيعة .. جمالها يعتمد عالجو ومحد يتحكم به غير الله سبحانه و تعالى .. فأحاول قدر الإمكان استغل الجو .. وهذا اتابعه عن طريق موقع الأرصاد accuweather.com و weather.com .. للإمارات وعمان .. متى ماكان الجو حلو .. طبعا المتوقع يكون قبله بيوم او يومين وأكون مستعد ومجهز عدتي .. مثلا اذا الجو حلو وبيستمر يومين او اكثر .. فابات اذا كانت المنطقة بعيدة مثل خصب او صور في عمان .. ومحد يعرف شو يصير .. انت فقط اهم شي عندك تمتلك خبره كافية في معرفة اماكن الاضاءة والظلال واختيار العدسة المناسبة والفلاتر دايما تشلها معاك وتجربها وتعرف كيف تسيطر على آلة التصوير عشان تحصل على افضل نتائج ..
في أي مجال لابد للشخص من تطوير نفسه حتى يصل للاحتراف في ذلك المجال فكيف تطور نفسك في مجال التصوير ، ونصيحتك للمصورين لتطوير قدراتهم ؟
عن نفسي بصراحة بعدني ما وصلت للاحتراف .. لان الاحتراف اذا كنت متخصص في مجال معين فالتصوير ويكون مصدر دخل من وراه .. ويكون خبير في مجاله كونه يمارسه من فترة طويله .. فالأغلبية منهم يفكرون في المادة .. عندج المصور الصحفي ابسط مثال ..
من خلال تجربتي ..اقول بكل صراحة والله يشهد على كلامي لهم .. دائماً اعتمدت على نفسي في البداية .. تعلمت واكتشفت اشياء ما تنعطى فالدورات وتأكدت من هالمعلومات بنفسي في المواقع الاجنبية واليوتيوب وهالشي زادني ثقة في نفسي الحمدلله .. وما زلت أتعلم وابحث واتابع مصورين عالمين .. واذا اكتشفت معلومة يديدة .. ما اعتمد عليها لين ما أتأكد منها واجربها بنفسي وابدا ابحث في اليوتيوب او القوقل . واسمع للمصورين اللي دائماً يصورون ويغامرون وأكيد يمتلكون خبرة لانهم يمرون بتجارب مختلفة باستمرار .. اولهم علي بن ثالث الحميري .. وابتعد عن اللي تجاربهم قليلة وكلامهم اكثر .
ونصيحتي لكل مصور طموح ..
اذا كنت تبا تتعلم .. اهم شي انك تحب التصوير وتحب عدتك ..
تعرف على عدتك وتعلم الفرق بين العدسات لان محد يعرف انت شو من عدسات تحتاج .. انت تعلم عنها عشان تعتمد على نفسك و مارس التصوير ولا توقف .. يمكن تشوفه صعب فالبداية بس لا تنحبط ولا تتراجع .. واقرأ في النت لانه بحر من المعلومات .. وحاول تطبقها واختبر نفسك .. اقرأ كل شي يخص التصوير .. اذا كنت تحب اعمال مصور حاول تقلده ترا مب عيب .. انت تقلده تختبر قدراتك فقط
وخل هالشي بينك وبين نفسك .. تواصل معاه وسأله عن لقطاته وخذ نصائحه بس اذا تبغي تكون مميز لا تتبع أسلوب اي حد تراك ما سويت شي .. ما يبت شي يديد في الساحة .. خذ العلم منه اذا عطاك وزيد لمساتك الخاصة او حاول تضيف افكار يديدة او تاخذ التقنية في تنفيذ أفكارك .
ولا تأخذ نصيحة مصور واحد لانه أكيد عنده أسلوبه الخاص .. شوف اعماله قبل واحكم .. ونصيحة لا تسمع من شخص فقط يتكلم وماعنده اعمال قوية .. يمكن يمتلك شهادة لكن خبرة لا والسبب انه ما يمارس
وماسك منصب من ورا الشهادة . اسمع لأفضل المصورين لكن مش من شهايدهم بل من أعمالهم القوية .. ودائما اقول الخبرة افضل من الشهادة وأعمالك هي اللي تتكلم عنك ..
والصورة دائماً تكون جميلة بمجرد انها يت بفكرة يديدة .. حتى لو كانت بسيطة .. ولا تفكر فاضل كاميرا وتقول لازم هذي ولا ما قدر اصور .. الا اذا كنت واصل لمرحلة انك فاهم شو تحتاج لمجالك وتعرف تفرق بين الكاميرات ..
واللي يقول لك لازم تصور جذي ولازم تصور جذي !!! تأكد انه تفكيره محدود .. الناصح الناجح ما يقول لك انت شو لازم تسوي .. يقول لك روح وجرب بنفسك وشوف شو تكتشف .. اقنع نفسك وامتلك الخبرة ..
دائماً استمتعوا فالتصوير .. لانه إحساسك وثقافتك ومشاعرك .. هذي لغة العالم .. حتى الطفل اذا شاف صورة فيها إثارة ومرح تحصله يبتسم يضحك ..
شكرًا وآسف عالتاخير
المفضلات