مبدع التصوير سعيد العامري (سفير دبي)

[عــيـ دبـي ــون]

أحبتي نظرا لرغبه الاعضاء
تمديد هذه المقابله
راح نخليها لغايه يوم الخميس ان شاء الله

[سعيد العامري]

حيآك آلله سعيد آو سفير دبي.. كمآ تشآء

سفير دبي لدي وجهة نظر بآلتصوير ب آمكآنك آقنآعي آو آقنآعك ..!

وجهة نظري ..

(آن آلتصوير صوره حقيقه ولكنهآ ورقيه مجرده من آلحركه وتنقل آلحقيقه بمعيآرهآ آلثآلث .. ولكن في آلوقت هذآ مع تطور عدسآت آلتصوير ونزول برآمج مطوره في تعديل آلصور آصبحت آلصوره مصوره ومرسومه..
فقدت آلكميرآ جمآلهآ آلقديم وآكتست ثوب آلتزيف آلمطور ..!! قبل آيآم كنت آشآهد صور آلتقطت من حوش(حوي) عمي فقلت لبنت عمي معقولة هآلسمآء آلمزرقه بآلسعوديه..؟؟ قآلت لآ هذآ سمآء عدسة كآنون , سعيد نعم تصويرك رآئع وآنت مبدع وتعجبت مرة حينمآ علق عيون دبي على آحدى صورك ب آنهآ صآفيه من آلتعديل لكني بكل صدق لآآصدق عدستك دآئم ..هذآ لآيعني آني آقول آنك تستخدم آلفوتو لآ لكن بعض آلصور يستحيل للمنطق آن تكون بهذه آلروعه ..)

هل آلتصوير آلآن ليس صورورقيه, آنمآ صور معآلجه؟..؟؟ آو كآن آلتصوير قديمآ لذكرى وآلآن هونتآج دورآة تصويريه ..؟؟



آعذرنيعلى آلآطآله كنت آنتظر آللقآء لهذآ آلسبب..

مرحباااااابك عزيزي

وجهة نظرك احترمها اخي الكريم .. و سؤالك جميل وعجبني جدا ً

كل الكلام اللي قلته صح بخصوص التعديل .. وما اقدر الوم اي حد يقول نفس كلامك .. لان معظم المصورين صاروا يعتمدون على التعديل بشكل اكبر من التصوير .. واللي حولهم يعتقدون ان التصوير خلاص كله تعديل والخ .. هو التعديل موجود ولا بد منه .. لكن بطريقة معقولة .. يمكن كلامي لين هني مب مقنع .. ادري ..

حتى ايام الكاميرات الفلمية .. اسال المصورين القدامى الي يحمضون الافلام بانفسهم ولا تسال المصورين الي كانوا يودون افلامهم للمحلات عشان التحميض ..

اسال اللي كانوا يحمضون الافلام بانفسهم .. كانوا يعدلون الصور اثناء التحميض ..

اذا كان يريد تشبع لوني .. كان يسويه اثناء التحميض ..
وحتى بالابيض والاسود .. اذا كان يريد يزيد التباين بين بالابيض و الاسود contrast كان يحرق بالتحميض ،اذا حب يحولها sepia يسويها .. اذا هناك تعديل حتى ايام الفلم

لكن هناك فئة تبالغ في التعديل جدا جدا في التصوير الرقمي .. لدرجة انه يغير معالم الصورة .. واقبال كبير من الشركات اللي تتعاقد معاهم ..

وكلنا نعالج النواقص في صورنا بطريقة معقولة وما اعتقد فيها شي .. لانه جزء من الفن ..

الكاميرا يا اخي الكريم عبارة عن صندوق اسود يحبس الضوء

وكيف تتحكم بالضوء هذا يعود على مهارة المصور ..

جرب بنفسك تصور منظر طبيعي والشمس امامك وخلها شوي على يمين الاطار وصور .. بتلاحظ صار عندك خلل في الاضاءه .. اما تشوف السما بالوانها وتشوف الارض سودا .. او العكس
الارض بالوانها والسما بيضا .. لان الكاميرا فقط تقرا الاضاءة ..

مثال ثاني اخي الكريم ..

جرب تصور المنظر الصبح بعد الشروق بساعة .. او العصر ..
صور اي منظر وخل الشمس ورا ظهرك .. بتلاحظ السما والارض بالوانها .. هذا شرح مبسط بس عشان توصلك الفكرة .. ومافي مثل عين الانسان سبحان الله .. فهذي مجرد الة تصوير ..

فاختيار الوقت مهم جدا فالتصوير عشان تحصل الوان جميلة .. بالذات في بلدانا .. واحسن وقت في الشتاء .. في الصباح والعصر بتشوف السما زرقا وكانك في اوروبا .. بالذات بعد سقوط المطر ..

هذي الصورة من تجاربي.. وشافوها وايدين واعتقدوا انها بالفوتوشوب




والصورة ما تتعدل في الكاميرا .. ولو عدلتها بالفوتوشوب مستحيل تردها للكاميرا .. وهذا الفيديو كدليل .. يمكن تعرف انواع الصور بصيغ مختلفة مثل JPEG او GIF او TIFF
ولكن RAW تعني خام .. وبتشوفها في اسفل يمين الشاشة في الفيديو

http://www.youtube.com/watch?v=zfw684FUCnE



هل آلتصوير آلآن ليس صورورقيه, آنمآ صور معآلجه؟..؟؟ آو كآن آلتصوير قديمآ لذكرى وآلآن هونتآج دورآة تصويريه ..؟؟

هذا طبعا يعتمد على المصور نفسه .. وشو ميوله .. بالنسبالي التصوير الفوتوغرافي رسالة وحس وفن وذوق ليس فقط صور ورقية ..

لكن بتشوف في التصوير التجاري يتطلب من المصور انه يركب ويعدل في الصور وهذا المجال يسمونه مصمم جرافيكس graphic designer

مصمم ومصور في نفس الوقت

شكرا عزيزي وعجبتني اسئلتك واتمنالك التوفيق

[سفيرة دبـي]

ما شاء الله اجابات شافيه تفيد كل مبتدأ في عالم الضوء
استاذ سعيد شو رايك بالي يصير انه الشعب كله يمتلك كاميرا
واصبح التصوير لكل من شاء التغير عن الروتين و اقتناء الكاميرا ل(موضه) و بريستيج ..
وربي يوفقك ف رسالتك الابداعيه و اي نصيحه لي ك مصوره مبتدئه ..

[سعيد العامري]

مصورنا سفير الابداع بعالم التصوير

ماعندي أسئله اقدر ازيدها علي اخواني وخواتي
بالمنتدي
الصور تتحدث عن ميلاد مصور تفخر الدوله
انه يكون واحد من ابناؤها المتميزين
واللي تقدر تفخر به بها المجال
فعلا انت فخر للوطن ولنا وللتصوير
يعطيك العافيه
لحقت اهنيك وما اقدر اوفيك حقك
لك شكري واعجابي وتقديري
اختك الغربه
اخوي
عيون دبي
هذا التميز مب غريب عليك
عشان يكون غريب علي منتداك واعضاءه
لك كل التقدير

كل الشكر والتقدير لج اختي الكريمة .. على الكلمات الطيبة

يزاج الله خير

[سعيد العامري]

حياك الله مصورنا المبدع في منتداه الرائع ..

نورت منتديات عيون دبي بتواجدك ومقابلتك الرائعه والمميزة ..

اسعدنا جدا هالتواجد الرائع والمميز ..

نبدا بالاسئله ..

الله يحيج اختي

ما الشي الذي جذبك في التصوير وجعلك من عشاقة ؟


كنت احب ارسم الطبيعة .. والحين اقدر اكمل هالمشوار بالتصوير ..

وبعدين فالتصوير .. حس .. فن .. ذوق .. صبر .. مغامرة

وايد اشياء تعلمتها من هالهواية ..


نرى ان معضم المصورين يحملون حقيبة مليئة بالمعدات عن ذهابهم الى رحلات التصوير؟ ، ما هي اهم الادوات التي يحتاج لها المصور ؟


الحين هني يعتمد عالمصور وشو يصور ..

يمكن يكون متخصص في الطبيعة .. فبياخذ معاه عدسات خاصه للطبيعة
مثل الـ wide angle وفلاتر وترايبود والخ ..

واذا كان مصور متخصص في الحياة البرية او الطيور .. فاكيد بيشل معاه عدسة خاصة مثل الـ telephoto .. والخ

ويقدر يستغل عدة مناسبة .. بوزن اقل ..

عدسة مداها من 24مم الى 70 مم ..

AF-S Nikkor 24-70mm f2.8

و اي عدسة تحت الـ 50 مم تعتبر wide angle

واللي فوق الـ 50 مم تعتبر telephoto

فهني انا ضربت عصفورين بحجر !

كيف ؟


العدسه هذي تفيدني للطبيعه لان فيها بُعد من 24 مم فتعطيني زاوية عريضة .. ونفس الوقت اقدر اصور بها بورتريه ( الناس ) لان بُعدها يوصل الـ 50 مم واكثر ..

فهذا يعتمد عالمصور .. لازم يعرف شو العدة المناسبة للمكان المناسب .. وايبضا ً يكون فاهم وملم في انواع العدسات والكاميرات اكسسوارات ..

ما هي الفعاليات التي شاركت فيها ؟؟ وما هي الجوائز التي حصلت عليها؟

شاركت في معرضين .. معرض الطفل الي تابع لـ حديقة الخور في دبي 2008 .. ومعرض التقارب اللي كان قريب من شارع الضيافة 2011 ..

و ما شاركت في اي مسابقة لين الحين ..

كلمه تود ان تقولها لمنتديات عيون دبي للابداع ؟

استمروا مع المنتدى .. لانه بيت طيب و يجمع اعضاء طيبين .. اتمنالهم التوفيق وان شاءالله فالطليعة .. احبكم في الله

[سعيد العامري]

خذ راحتك ،

ماشا الله

يزاك الله خير

بما انك قلت عادي نسأل بعد ، ^^ قلت استغل الفرصة الذهبية
قريت كلامك عن المانيوال ،
انزين .. أنا خاطري أعرف يوم أحطه عالمنيووال واصور تطلع الصورة سودة
أسير المنيو، اختيار الشتر وخيار ثاني بعد اتوقع الايزو، واغيرهم عشوائي واروح اصور ، اذا ماعيبني اروح اغيرهم مره ثانيه عشواي،
( الحين انا حابة استخدمه استخدام دائم بدال زر الاوتو والماكرو والبورتريت،،، فهمت؟)
خاطري اعرف متى انقص الشتر ومتى ارفع الشي الثاني ( الايزو اتوقع )

وايد قريت عن هالشي فالنت عن فتحة العدسة والشتر بس مافهمت شي ياليت لو عندك طريقه مبسطه تخليني افهم هالشي وايتم فبالي
بالتوفيق
واعذرني ... وشكرا لك

اختي الكريمة .. ارجعي من الصفر .. وانسي الوضعيات كلها لمدة قصيرة

انتي سالتي سؤالين مهمين وجوابهم واحد ..سالتي ليش تطلع الصورة سودا .. ومتى تنزلين الشتر والشي الثاني ( تقصدين فيه فتحة العدسة ) والايزو ..

التصوير هو ضوء .. وجميع كاميرات الـ D-SLR ( اللي تسمونها احترافية ) فيها نفس الاساسيات ..

Shutter Speed
Aperture
ISO

اذا تحكمتوا بالـ 3 هذيله .. بتكونون عديتوا اول خطوة في عالم الضوء

لانكم تتحكمون بالاضاءه عن طريق استخدامكم لها .. وطبعا لهم وظايف ثانية بس ما بذكرها عسب ما تصير خربطة .

بتكب نقاط مهمة بختصار شديد .. ويتعلقون بالاضاءة ..

اختي

Shutter Speed

الغالق .. الي يتحكم بمدة دخول الاضاءة للسنسر ( الوقت ).. فـ كل ما كان سريع .. قلت مدة دخول الاضاءة وكلما كانت ابطأ .. زادت مدة دخول الاضاءه .. وهذا نسميه التعاريض المختلفة .. تعريض طويل وتعريض قصير

وتتحكمين بهم بالارقام

Aperture

فتحة العدسة .. تتحكم بكمية دخول الاضاءة للسنسر .. وكل كانت الفتحة كبيرة .. كمية دخول الاضاءة اكبر .. وكلما ضيقت فتحة العدسة .. كمية دخول الاضاءة تكون اقل ..

وايضا ً تتحكمين بهم بالارقام

هذي الارقام بالصور



الـ ISO

حساسية السنسر .. كلما زاد الرقم .. زادت الاضاءة ولكن يصير عندج تحبب في الصوره . وكلما نقصتي نقصت الاضاءة وتكون الصورة انظف

بس ما انصح به .. خلي الايزو دايما على اقل شي ..عشان الصورة تكو ن خالية من التحبب والجودة تكون عالية ..

----

وهذيله تتحكمين بهم Manual واعرف بتقولين صعب وارقام وبلاوي

لكن يوم بتجربين تصورين مينوال

بتشوفينه سهل مع الوقت وبتعرفين الوضعيات الثانية مثل الوردة وقمر والخ كان كلام فاضي ..

وماشي اعدادات ثابته .. لان كل مكان ولكل زاويه الوانها .. والكاميرا اذا شافت الاسود حتى لو فالنهار فبتقراه ان الاضاء ناقصة
واذا شافت الابيبض فبتقراه ان الاضاءه عالية



كيف بتعرفين ان الاضاءة عندج مناسبه ولا لا وانتي تغيرين في ارقام الشتر والفتحة والايزو ؟

بعد ما تختارين وضعية المينوال .. الكاميرا تطلع لج شريط لقراءة الاضاءة للزاوية اللي تختارينها .. وهالشريط على يمينه سالب ويساره موجب اوالعكس يعتمد اذا كانت الكام كانون ولا نيكون

شريط مثل هذا



او على هالشكل



حتى داخل االـViewfinder



شوفي وين الدايرة الحمرا



غيري في ارقام الشتر وفتحة العدسة << والايزوم خليه 100 ثابت ..

بتلاحظين الاشارءة تتجه للموجب او السالب ( حسب اضاءة المكان )

اذا اتجهت للسالب ،، يعني الاضاءه ناقصة .. عندج خيارين .. اما تنقصين سرعة الشتر او تكبرين فتحة العدسة .. بتلاحظين الاشارة تتجه لنص الشريط ،، جربي ولعبي مع الكاميرا وبتعرفين .. واذا شفتي الاشاارة متجهة للموجب . سرعي الشتر عشان تنزلين الاضاءة او ضيقي فتحة العدسة

وجربي تصورين عالسالب والموجب عساب تكون عندج فكره كيف تطلع الصوره

نتريا النتايج واتمنالج التوفيق

[سعيد العامري]

نشوفنا بنطول مده اللقاء عيل






من هو افضل مصور اماراتي في نظرك والافضليه في الاحتراف اقصد



لك الكثير من الاصدقاء وخاصه من لديهم هوايه التصوير من تتوقع منهم سيكون له اسم في عالم التصوير والابداع


خبرني عن هالطفل ماشاء الله عليه

كيف تقبل هذا الدور

مشكور اخوي عيون دبي .. يزاك الله خير

من هو افضل مصور اماراتي في نظرك والافضليه في الاحتراف اقصد ؟


علي الحميري و الاخت احلام الاحمد

لك الكثير من الاصدقاء وخاصه من لديهم هوايه التصوير من تتوقع منهم سيكون له اسم في عالم التصوير والابداع

سؤال صعب بصراحة ههههه .. لان عندنا مبدعين كثر الحمدلله .. واحس انهم بيوصلون للعالمية وبيرفعون راسنا ان شاءالله .. اتمنالهم التوفيق ..


خبرني عن هالطفل ماشاء الله عليه .. كيف تقبل هذا الدور ؟



هذا اخوي و اسمه راشد .. وعمره 10 سنين .. هذروب ما يسكت ههههههه

هو اكثر شي يطلع ويا الوالد ..

والوالد في فترة كان مسافر .. وراشد ملان متعود يطلع

قال لي ملان ابا اطلع وياك .. فشاف التصوير وربعي ونتكلم ونستخدم مصطلحات فالتصوير مثل اكسبوجر واف ستوبس .. وراشد يسال هذا شو يعني وهذا شو يعني .. عيبته السالفة .. فقام يطلع وياي كل يوم وربعي حبوه لانه ما يسكت فالسيارة .. وحب التصوير وعلمناه كيف يتحكم بكاميرا بسيطة ..

راشد - عبدالله الشحي - انا - سمشد عبدالله









و هو ماشاءالله ما يسكت فالسيارة .. كنت اكلم ربعي عن افكار يديدة وهو كان مطفربي يبا تويكس ههههه قلت له اسكت خلني ارمس الريال .. قال والله انا مسكين .. يتني هالفكرة .. وتقبل الدور وحتى يوم يتصور يتكلم ما يسكت.. يقول لي سعود .. ريلي تاكلني .. ولا ظهري ياكلني هههههه .. بسرعة انا يوعان ..












بس الحين موقف لانه مركز فالدراسة ..

تسلم اخوي عيون دبي

[سعيد العامري]

بسم الله الرحمن الرحيم

أخي المبدع والمميز ....

سعيد العامري

بكل تحيه وإحترام أقف بهذا المنتدى ... وأوقع على روعة ذلك اللقاء ..
مميز بكل ما بالكلمة من معنى ....
لم يتبقى لي أي أسئلة ... بل وأيضاً لم يتبقى لي شيئ إلا وقد إستفدت منه .. كل كلمة قرأتها بهذا اللقاء كانت فائدة لي ..

فشكراً لك .. ولأخي عيون دبي على إتاحة الفرصة لنا بالإستفادة من تلك الأسئلة .. والردود ...

مع كل إحترامي وتقديري

مشكور اخوي من ذوقك .. وتشرفت بحضورك و بتواجد الاعضاء

يزاك الله خير

[سعيد العامري]

ما شاء الله اجابات شافيه تفيد كل مبتدأ في عالم الضوء
استاذ سعيد شو رايك بالي يصير انه الشعب كله يمتلك كاميرا
واصبح التصوير لكل من شاء التغير عن الروتين و اقتناء الكاميرا ل(موضه) و بريستيج ..
وربي يوفقك ف رسالتك الابداعيه و اي نصيحه لي ك مصوره مبتدئه ..

تسلمين وبارك الله فيج .. حبي التصوير .. حبي كاميرتج ..

لان حبج للكاميرا وللتصوير .. بيدخلج في عالم الضوء وتبحثين اكثر ..

اقري مجلات وشوفي دروس عاليوتيوب .. اذا مرت عليج كلمة يديدة تبين تتعلمينها .. النت بحر وحاولي تبحثين عنها فالقوقل واليوتيوب

اتمنالكم التوفيق شكرا

[علياء]

"

هلا فيك اخوي سعيد ما عندي اسلئة اقدر ازيدها ع إخواني وأخواتي بالمنتدي فعلا انت فخر للوطن ولنا ويعطيك العافية نشكر عيون دبي ع إتاحة الفرصة لنا

تحياتي "عليا"