00 - همســات غــريــاف - 00

[غرياف]

الســـلام عليــكـــم و رحمـــة الله و بـــركــــاتــه ..

أســـمــــي : غريـــاف ..

عمــــــري : مواليد 90 ــ يعني الحين 22 سنه .. ( في عمر الزهور ^_^ )

المهـــــــنه : طــالبــه / Business- Bachelor in Human Resources

هوايــاتــي : كانت أعشق تصفح النت بس وصلت لمرحلة التشبع و صرت احب اقرأ و انشغل بدراستي و مشاريعي بشكل كبير.

طموحاتـي : خاطري أسوي شي مهم يخلد أسمي - أفكر بعد ما اتخرج اسوي بزنس صغير - بعدني ادور على فكره.

صداقاتــي : عندي صدقاتي الي كانوا معاي في الثنويه العامه ومن بعدها افترقنا و كلن انشغل في حياته و في الكليه تجمعني مع بنات علاقة الزماله فقط
و ما زلت ابحث عن الصداقه في كل مكان ^_^.. بس تعرفت في حياتي على بنات اخلاقهم عاليه رغم ان ما نتلاقى ابدا الا اني ما اقدر انساهم .. الله يجمعني وياهم.

منتديــات عيون دبــي ..:

أخــونــا عيون دبي تجمعنا معـاه ذكريات رائعه .. ( بحلوق دبي ) .. ما شاء الله بدا ابداعه بموقع صغيرون و عقب بركز تحميل
و الحين موقع رسمي رائع و منتدى واضح انه متعوب عليه .. الله يوفقه .. وتستمر مسيرة الابداع ^_^
.
.
.

هذا الي عندي لكم لين الحين .. انتظروني مع جديدي اليومي .. ^_^

.
.
.

Princess

غريــــاف ^__^

[غرياف]

على فكره .. عادي تردون على الموضوع .. اذا حد يبى يعلق على شي يتفضل ^_^ ..

[غرياف]

السلام عليكم و رحمة الله وبركاته ..


بداية يوم دراسي جديد و انتقلنا اليوم لكلاس يديد ^_^ ..
الكلاس حلوو و واسع بس اخاف بنات الكلاس يضاربون لان التغيير مفاجأ و بعض البنات ما يناسبهم التغيير ^_^
بس بنسبة لي الحمدلله مرتاحه ..


تمنوا لي التوفيق ^_^

[غرياف]

السلام عليكم و رحمة الله وبركاته ..

مساكم الله بالخير .. الساعه الحين 2:06 صباحا و انا موب قادر ارقد !!
و كنت شاريه مجموعه طارق السويدان الخاصه بقصة خالد بن الوليد رضي الله عنه و كل يوم اسمع شي منها قبل الرقاد
بس اليوم بما ان الرقاد طااار فضلت اني اسمع اكثر و اتعرف على هذي الشخصيه البارزه .. انا من اشد المعجبين بخالد رضي الله عنه.

و الحين فتحت الكمبيوتر على اساس اكمل بروجيكتي بس بمجرد ما شفت البحث حسيت بكسل خخخ

يعلموني كيف ابدا مشاريع جديده خاصه فيني .. الحين يالسه اسوي الخطه ^_^ مادري اذا حد بيشتري مني المشروع بعدين او لا لوول
يقولون ان الامارات تبى مبدعين جدد و راح تدعم مشاريعهم فقلت اشد حيلي و ابدع ^_^ ما بخبركم فكرتي اخاف تسونها لوول

خلاص انتهى وقت اللعب و لازم اسوي البروجيكت و لين تصير الساعه 3 و ربع بصلي القيام و عقب الفجر و برقد شوي لين ايي وقت الذهاب لطلب العلم

الله يعيني على السواقه بعيون نعسانه لووول بشرب كوفي قبل لا اظهر من البيت ..


مع السلامه ..

غريـــــافووو ^__^

[غرياف]

على فكره .. عادي تردون على الموضوع .. اذا حد يبى يعلق على شي يتفضل ^_^ ..

ترى من قوانين القسم ان محد يرد على مدونة الثاني لووول توني استوعب ^_^


السموحه منكم

[غرياف]

السلام عليكم و رحمة الله و بركاته ..

بسرعه بكتب لكم لان بطارية الاب توب بتخلص لوول


صباح اليوم كان جميييييل و الحمدلله ^_^
ما نسيت الاي دي خخ موظفة الاستقبال تتبسم لاني ما نسيت الاي دي لوول يعني ما بتضارب وياي ع الصبح ^_________^
اليوم عندي كلاس ارت ^______^ بروح اللعب بالفخار .. اكيد بتقولون شو يخص الارت ف البزنس !! لا تسالوني اساله صعبه ههههه

بشوفكم بعد ما اشحن الاب توب ^_^


غروووفه

[غرياف]

السلام عليكم ورحمة الله وبركاته ..

اليوم 4-10-2012 .. تاريخ اليوم يصادف وفاة أمي الله يرحمها قبل 4 سنوات ..!
سبحان الله الايام كيف مرت بهذي السرعه !!

و خلال هالاسبوعين سمعت عن اكثر من 5 اشخاص توفوا بشكل مفاجأ !!
ياربي ارحمنا .. اللهم اني اعوذ بك من الموت فجأه ..!

.
.
.

ما زلت مشغوله بمشاريع الكليه .. و كل يوم اشوف طلباتهم تزيد !! وبعدين يعني !!
ابا الايام تمر بسرعه و اتخرج .. رغم اني بشتاق لجو الدراسه بس الضغط ما احبه %_%
.
.
بسير اكمل الي كنت اسويه .. مع السلامه

غريـــاف ^_^

[غرياف]

السلام عليكم ورحمة الله وبركاته ^_^


شو الاخبـــار ...؟


احضر هذا الاسبوع لشي حلووو ... بسويه يوم الاحد .. بصوره لكم و بحطه في قسم التصوير ^_^

متحمسه


ادعوا لي

[غرياف]

مساكم الله بالسعاده ..


توني مخلصه من تصميم البروشورات الي بوزعها في المتحف ^__^ متحمسه للمتحف
و باجر بنسير رحله تعليميه ترفيهيه لـ .... ما بخبركم ^__^

ادعوا لي دائــــــــــما ..

تصبحون على خير ..

غرياف

[غرياف]

السلام عليكم و رحمة الله وبركاته .. ^_^

كيف الحال ..؟ // جمعه طيبه على الجميع ان شاء الله ..


تعالوا بعلمك شي حلو .. ما كنت اعرفه لاكني عرفته بعد ما قرأة كتاب ( فقه السنه )

حد منكم يعرف عن صلاة التسبيح !!!! كيف كنت غافله عنها !!

خلوني اعلمكم ... هذا الحديث :

« صَلاةُ التَّسْبِيحِ »
عَنْ عكرمة عَنْ ابنِ عبَّاسٍ رَضِيَ اللهُ عَنْهُ قَالَ : قَالَ رَسُولُ اللهِ صَلَّى اللهُ عَلَيهِ وَسَلَّمَ للعبَّاسِ ابنِ عَبْدِ المُطَّلِبِ : « يَا عبَّاسُ يَا عَمَّاهُ ! أَلا أُعْطيكَ ، أَلا أَمْنَحُكَ ، أَلا أَحْبُوكَ ، أَلا أَفْعَلُ بِكَ عَشْرَ خِصَالٍ ؟ إِذَا أَنْتَ فَعَلْتَ ذَلِكَ غَفَرَ اللهُ لَكَ ذَنْبَكَ : أَوَّلَهُ وَآخِرَهُ ، قَدِيمَهُ وَ حَديِثَهُ خَطَأَهُ وَعَمْدَهُ ، صَغِيرَهُ وَكَبِيَرهُ ، سِرَّهُ وَعَلانِيَتَهُ ، عَشْرَ خِصَالٍ : أَنْ تُصَلِّيَ أَرْبَعَ رَكَعَاتٍ تَقْرَأُ في كُلِّ رَكْعَةٍ فَاتِحَةَ الْكِتَابِ وَسُورَةً ، فَإِذَا فَرَغْتَ مِنَ الْقِرَاءَةِ في أَوَّلِ رَكْعَةٍ فَقُلْ وَأَنْتَ قَائِمٌ : سُبْحَانَ اللهِ وَالْحَمْدُ للهِ وَلا إِلهً إِلَّا اللهُ وَاللهُ أَكْبَرُ خَمْسَ عَشَرَةَ مَرَّةً ، ثُمَّ تَرْكَعُ فَتَقُولُهَا وَأَنْتَ رَاكِعٌ عَشَراً ، ثُمَّ تَرْفَعُ رَأْسَكَ مِنَ الرُّكُوعِ فَتَقُولُهَا عَشْراً ، ثُّمَ تَهْوِي سَاجِدَاً فَتَقُولُهَا وَأَنْتَ سَاجِدٌ عَشْراً ، ثُمَّ تَرْفَعُ رَأْسَكَ مِنَ السُّجُودِ فَتَقُولُهَا عَشْراً ، ثُمَّ تَسْجُدُ وَتُقُولُهَا عَشْراً ، ثُمَّ تَرْفَعُ رَأْسَكَ فَتَقُولُهَا عَشْراً ، فَذلِكَ خَمْسٌ وَسَبْعُونَ في كُلِّ رَكْعَةٍ ، تَفْعَلُ ذلِكَ في أَرْبَعِ رَكَعَاتٍ ، إِنْ اسْتَطَعْتَ أَنْ تُصَلِّيَهَا في كُلِّ يَوْمٍ مَرَّةً فَافْعَلْ ، فَإِنْ لَمْ تَسْتَطِعْ فَفِي كُلِّ جُمُعَةٍ مَرَّةً ، فَإِنْ لَمْ تَفْعَلْ فَفِي كُلِّ شَهْرٍ مَرَّةً ، فَإِنْ لَمْ تَفْعَلْ فَفِي كُلِّ سَنَةٍ مَرَّةً ، فَإِنْ لَمْ تَفْعَلْ فَفِي عُمُرِكَ مَرَّةً (1) » .
أخرجه أبو داوود وابن ماجه وابن خزيمة في صحيحه

.
.
.

دام الرسول وصانا بها حتى لو مره في العمر !! يعني اكيد هي في غاية الاهميه !!

تعلموها ترى سهله و خبروا الي مايعرفها .. غفر الله لي و لكم ..


غرياف